Starfsfólk Þjóðminjasafns Íslands tekur vel á móti fjölskyldum í vetrarfríi

Heimsókn í Þjóðminjasafnið er skemmtileg og fræðandi fyrir alla fjölskylduna og við bjóðum uppá margs konar leiðir til að upplifa sýningarnar okkar. 

Til dæmis er hægt er að ganga um grunnsýninguna og spila hljóðleiðsögn fyrir börn og fullorðna í síma. Sérstök hljóðleiðsögn, Regnbogaþráðurinn, fjallar um hinsegin sögu á Íslandi. Svo er hægt að horfa á myndskeið á margmiðlunarskjáum, uppgötva litríka, viðkvæma gripi í skúffum og hlusta á leikþætti um fullorðinn og barn frá mismunandi tímaskeiðum í Íslandssögunni. Leggir og kjálkar, bóndabær með búpeningi og búaliði, myndir til að lita og útskurðarletur til að herma eftir er til taks í fjölskyldurýminu Stofu þar sem einnig eru búningar til að máta og fleira áhugavert til að spjalla um eða leika sér með.

Smiðjur, ratleikir og skemmtiganga

Í Stofu verður hægt að föndra eigið eldfjall í vetrarfríinu. Þar fær sköpunarkrafturinn heldur betur lausan tauminn enda geta eldfjöll hagað sér alls konar eins og við íbúar Íslands höfum fengið að fylgjast með undanfarna mánuði. Á staðnum verður dökkur pappír fyrir eldfjallið sjálft og bjartir litir úr ýmsu hráefni fyrir glóandi hraun.

Á sýningunni Mannamyndasafnið er silhouettustöð. Tvö saman vinna myndina með því að festa svartan pappír á vegg. Annað sest í stól þannig að hliðin snúi að veggnum og hitt lætur lampa lýsa á andlitið þannig að skuggi varpist á blaðið. Teiknið útlínur með blýanti eða lit, klippið út og límið á hvítt karton.

Ratleikir eru góð leið til að kynnast grunnsýningu safnsins á líflegan hátt. Leikirnir henta allri fjölskyldunni og er sérstaklega gaman fyrir foreldra og börn að leysa þrautirnar saman. Hægt er að nálgast ratleikina í móttöku Þjóðminjasafnsins og eru viðfangsefnin margbreytileg. Nú eru komnir nýir ratleikir sem nefnast Leitin að rúnaristunum og Safnabingó.

 Í vetrarfríinu verður boðið upp á skemmtigöngu á eigin vegum með tón, lykt og lit. Hvernig líður tíminn á Þjóðminjasafni? Hvaða tón er þar að finna? Og hvaða lykt? Hvernig er að skoða umhverfið í gegnum litað spjald? Í þessari skemmtigöngu verður notast við ferðatösku með ýmsum munum sem virkja skilningarvitin á leiðinni í gegnum safnið. Töskurnar fást í móttöku safnsins.

Í safninu eru þrjár sérsýningar; Mannamyndasafnið - málverk, ljósmyndir, útsaumsverk og höggmyndir í Myndasal og á Vegg, Hofstaðir - Saga úr jörðu sem fjallar um fornleifarannsóknir á Hofstöðum í Mývatnssveit í Bogasal og Kirkjur Íslands: Leitin að klaustrunum í Horni. Allar þessar sýningar gefa gott tækifæri fyrir fjölskyldur til að fræðast og ræða saman um sögu Íslands.

Aðgöngumiði í safnið gildir. Ókeypis fyrir handhafa árskorts og frítt fyrir börn yngri en 18 ára. Árskort kostar 2.000 kr. og gildir á allar sýningar og viðburði á Þjóðminjasafninu.

Verið öll velkomin. Góða skemmtun!


Eldgosasmiðja 14.10.2021 - 26.10.2021 Þjóðminjasafnið á Suðurgötu

Í Stofu verður hægt að föndra eigið eldfjall. Þar fær sköpunarkrafturinn heldur betur lausan tauminn enda geta eldfjöll hagað sér alls konar eins og við íbúar Íslands höfum fengið að fylgjast með undanfarna mánuði. Á staðnum verður dökkur pappír sem er fyrir eldfjallið sjálft og bjartir litir úr ýmsu hráefni fyrir glóandi hraun.

Lesa meira
 

Ferðataska með snertingu, tón, lykt og lit 14.10.2021 - 26.10.2021 Þjóðminjasafnið á Suðurgötu

Hvernig líður tíminn á Þjóðminjasafni? Hvaða tón er þar að finna? Og hvaða lykt? Hvernig er að skoða umhverfið í gegnum litað spjald? Í Þessari skemmtigöngu verður notast við ferðatösku með ýmsum munum sem virkja skilningarvitin á leiðinni í gegnum safnið. 

Lesa meira
 

Silhouettustöð 14.10.2021 - 26.10.2021 Myndasalur - Þjóðminjasafnið Suðurgötu

Á sýningunni Mannamyndasafnið er silhouettustöð. Tvö saman vinna myndina með því að festa svartan pappír á vegg. Annað sest í stól þannig að hliðin snúi að veggnum og hitt lætur lampa lýsa á andlitið þannig að skuggi varpist á blaðið. Teiknið útlínur með blýanti eða lit, klippið út og límið á hvítt karton.

Lesa meira