Leiðin á milli
Til sýnis voru frumleg listaverk þriggja listamanna sem kenna sig við Andrá og vinna með menningararfinn. Þetta eru þær Guðbjörg Lind Jónsdóttir, Guðrún Kristjánsdóttir og Kristín Jónsdóttir frá Munkaþverá.
Á sýningunni Leiðinni á milli sóttu listakonurnar innblástur í muni úr Þjóðminjasafninu. Fyrir sýninguna hélt Andrárhópurinn meðal annars í könnunarleiðangur um geymslur safnsins og naut leiðsagnar sérfræðinga.
Á sýningunni voru þrjár innsetningar, Hringhenda , Aðdráttarafl og Gestrisni. Ný verk voru sett í samhengi við gömul og þjóðminjar þannig sýnd í nýju ljósi. Leiðin lá milli staða, milli einstaklinga, milli fortíðar og líðandi stundar, listtjáningar fyrr og nú, menningararfsins sem geymdur er í Þjóðminjasafninu og listrænnar endursköpunar hans. Oddný Eir Ævarsdóttir sýningarstjóri sagði: ,,Einkennandi fyrir allar þessar leiðir er ákveðin togstreita og úr henni má lesa þrá eftir hreyfingu. Stundum í hring, örlítið skakkan, þráhyggjulega endurtekinn eða leikandi hraðan út fyrir túngarða og mörk tímans.”
Myndlistarkonurnar þrjár tjáðu hugmyndina um leiðina hver á sinn hátt en leiðir þeirra í tjáningunni fléttuðust líka saman. Sýninguna mátti skoða sem stefnumót þeirra við listamenn fyrri alda, skáldin og ferðalangana Látra-Björgu, Bólu-Hjálmar Jónsson og Jónas Hallgrímsson. Á ferðalögum sínum komu þau þrjú víða við sem gestir og þökkuðu fyrir sig með orðum, ljóðum, listaverkum og uppfinningum. Þeim var einnig boðið á sýninguna í Bogasalnum þar sem myndlistarkonurnar þrjár voru gestgjafar.
Guðrún, Kristín og Guðbjörg Lind gerðu ekki fræðilega úttekt á listamönnum fortíðarinnar heldur nálguðust þá gegnum sköpun, bæði þeirra sköpun og sína eigin, og einnig gegnum persónulega muni. Guðrúnu opnaðist sýn inn í kveðskaparheim Bólu-Hjálmars gegnum fagurlega útskorinn skáp hans sem nú er í eigu Þjóðminjasafnsins og Kristín náði sambandi við Jónas Hallgrímsson með því að draga rauða skrifborðið hans fram úr safngeymslu. Kaffibollar mynda tengingu Guðbjargar Lindar við förukonuna Látra-Björgu sem yfirgaf eldhússtörfin.
Myndlistarmennirnir sáu fyrir sér leiðir þessara þriggja listamanna fyrri alda, leiðir sem lágu að krossgötum á sýningunni í Bogasalnum. Eftir þessum leiðum komu ferðalangarnir.
Mikilvægt er að menningarminjum eins og þeim sem geymdar eru í Þjóðminjasafni Íslands sé miðlað til umheimsins og það má gera á marga vegu. Ein miðlunarleiðin felst í listrænni endursköpun eins og þeirri sem sjá má hjá Andrárhópnum. Í meðförum myndlistarmannanna var menningararfurinn settur í annað samhengi en áður og gegnum það fékk hann nýtt og óvænt líf. Sýningin í Bogasalnum var óður til þeirrar brotakenndu arfleifðar sem varðveist hefur í Þjóðminjasafninu og öðrum söfnum. Kristín, Guðrún og Guðbjörg Lind raða brotum fortíðarinnar saman gegnum listræna skynjun og listsköpun.