Sýning á ljósmyndum og kvikmyndum Vigfúsar Sigurgeirssonar frá 1936-1960.

Vorið 2008 var gengið frá sérstökum samningi milli Þjóðminjasafns Íslands og Nordiska museet í Svíþjóð um íslenska gripi sem hafa verið í eigu sænska safnsins frá því á 19. öld. Í tilefni þess að munirnir komu til Íslands vorið 2008 setti Þjóðminjasafn Íslands upp sýningu á gripunum sem stóð til 31. janúar 2009.

Endurkast er samsýning átta íslenskra ljósmyndara, sem nýlega stofnuðu Félag íslenskra Samtímaljósmyndara. Þessi sýning er jafnframt á dagskrá Listahátíðar. Í þokunni (In the Mist) er sýning franska ljósmyndarans Thomas Humery á myndum sem voru teknar nýlega hér á landi. Báðar sýningarnar standa til 14. september.

Til sýnis er SJÖUND eftir Gunnar Hersvein rithöfund og Sóleyju Stefánsdóttur hönnuð. Verkið felst í ljóðaumslagi og sjö grafískum ljóðamyndum. Með SJÖUND er gerð tilraun til að sleppa ljóðinu lausu úr ljóðabókinni og fólk fær tækifæri til að senda ljóð hvert til annars.

Á sýningunni eru þrívíð verk blindra og sjónskertra barna sem unnin voru í Myndlistaskólanum í Reykjavík veturinn 2007-2008, auk teikninga nokkurra nemenda skólans af verkum þeirra. Fjölbreytileg áferð, lykt og hljóð mismunandi efna voru nemendum og kennurum hvatning í leit sinni að nýjum og ævintýralegum möguleikum.

Sýningin Til gagns og til fegurðar byggir á rannsóknum Æsu Sigurjónsdóttur listfræðings á útliti og klæðaburði Íslendinga í ljósmyndum frá 1860 til 1960.

Á Veggnum stendur yfir sýningin Tvö-þúsund-og-átta með ljósmyndum Veru Pálsdóttur af fatatísku nútímans og fríkuðum fastagestum á skemmtistaðnum Sirkus. Sýningin er sett upp í samstarfi við tímaritið NÝTT LÍF en Vera starfar nú sem ljósmyndari NÝS LÍFS við góðan orðstír.

Textíllistaverkið Skammdegi eftir Ingibjörgu Styrgerði Haraldsdóttur var til sýnis í anddyri Þjóðminjasafnsins. Ingibjörg Styrgerður er fædd árið 1948. Hún stundaði nám við Myndlista- og handíðaskóla Íslands árin 1967-1974 og við Hochschule für angevandte Kunst í Vín 1974-1979.

Á 3. hæð Þjóðminjasafnsins voru til sýnis útsaumaðar jólaveinamyndir eftir Elsu E.Guðjónsson. Myndirnar hannaði og saumaði Elsa við vísnabálk sem hún orti um íslensku jólasveinana. Saumgerðin er gamli íslenski krosssaumurinn í stramma með íslensku eingirni.

Á sýningunni gat að líta ljósmyndir sem hinn heimsþekkti bandaríski ljósmyndari Mary Ellen Mark tók af fötluðum börnum á Íslandi. Þessar myndir sýna veruleika barnanna í samtímanum, en Mary Ellen Mark er þekkt fyrir myndir þar sem horfst er í augu við raunveruleikann.

Á sýningunni Undrabörn var brugðið upp áhugaverðri myndaröð eftir Ívar Brynjólfsson á Veggnum. Myndir hans sýna sérstaklega umhverfi hinna fötluðu barna í Öskjuhlíðarskóla, Safamýrarskóla og Lyngási.

Á sýningunni Undrabörn mátti sjá ýmis myndverk eftir undrabörnin sjálf, fyrrverandi og núverandi nemendur Öskjuhlíðarskóla og Safamýrarskóla. Í báðum skólum er lögð mikil áhersla á að örva börnin með markvissri handavinnu, meðal annars í myndlist.